ရွှေစက်တော် အထက်စက်တော်ရာတွင် ဘုရားဖူးယာဉ် တိမ်းမှောက်၍ တစ်ဦးသေဆုံး

မန်းရွှေစက်တော်ဘုရားပွဲတော် အထက်စက်တော်ရာအတက်လမ်း သုံးထပ်ဆောင် ဗိမ္မာန်အနီးတွင် မတ်လ (၁၂)ရက် နံနက် (၁၀)နာရီအချိန်ခန့်က ဘုရားဖူးယာဉ် တိမ်းမှောက်ကာ တစ်ဦးသေဆုံးပြီး (၆)ဦး ဒဏ်ရာရရှိသွားကြောင်း သိရသည်။

“တပေါင်းလပြည့်နေ့ဆိုတော့ ဘုရားဖူး တော်တော်များတယ်။ ကားတွေကလည်း ပြည့်ကြပ်နေအောင် တင်ကြတယ်။ အခုဖြစ်တာက အထက်စက်တော်ရာကို အတက်မှာ ဖြစ်သွားတာ။ အတက်မှာ မတက်နိုင်ဘဲ တုံးလုံးလဲသွားတာ” ဟု မင်းဘူး/စကုမြို့နယ်ကြက်ခြေနီသူနာပြုတပ်ရင်း ဒုတိယတပ်ရင်းမှူးတင်ညွှန့်က တာချီလိတ်သတင်းအေဂျင်စီသို့ ပြောသည်။

အဆိုပါ ဘုရားဖူးယာဉ်မှာ တောင်တွင်းကြီးမှ ထွက်လာသည့် လိုက်ထရပ် ဘုရားဖူးယာဉ်ဖြစ်ပြီး ဘုရားဖူး ခရီးသည်(၃၀)ခန့် တင်ဆောင်လာခြင်းဖြစ်ကြောင်း သိရသည်။

ယာဉ်တိမ်းမှောက်မှုကြောင့် တောင်တွင်းကြီးမြို့မှ ကိုကြည်နိုင်ဆိုသူမှာ နေရာတွင် သေဆုံးသွားပြီး ကျား(၃)ဦး၊ မ(၃)ဦး ဒဏ်ရာ ရသွားကြောင်း မင်းဘူး/ စကုမြို့နယ် ကြက်ခြေနီသူနာပြုတပ်ရင်း ဒုတိယတပ်ရင်းမှူးတင်ညွှန့်ထံမှ သိရသည်။

ဒဏ်ရာရသူများအား ဆေးကုသမှုခံယူရန် မင်းဘူးဆေးရုံသို့ ပို့ဆောင်ထားကြောင်း သိရသည်။