ကျွန်တော့်ကိုယ် ကျွန်တော်လိပ်ပြာလုံရင်အားလုံးကိုပေါ်တင်လုပ်ပါတယ်ဆိုတဲ့ ရဲရင့်အောင်
ဖေဖော်ဝါရီ ၁ ရက်နေ့မှာ လူမှုကွန်ယက်ပေါ်တင်ပေးခဲ့တဲ့ ဒီလောက်နဲ့ပဲကျေနပ်ပါတယ် သီချင်းနဲ့ပတ်သက်ပြီး ပရိသတ်အများရဲ့ ဝေဖန်မှုအခံရဆုံးသူကတော့ ရဲရင့်အောင်ပါ။ အဆိုပါသီချင်းကို ဝေဖန်မှုတွေများတဲ့ကြားထဲကပဲ ကြည့်ရှုသူမြင့်မားခဲ့သလို အဆိုတော်ရဲရင့်အောင်ကိုလဲ မျက်ရည်ချူတဲ့အဆိုတော်၊ မားကတ်တင်းဆင်းတဲ့အဆိုတော်ဆိုပြီး ခေါင်းစဉ်အမျိုးမျိုးတပ်ကာ ဝေဖန်ခြင်းကို ခံခဲ့ရပါသေးတယ်။ ရဲရင့်အောင်ဟာ အားလုံးသိတဲ့အတိုင်း အရှေ့မှာ အသည်းကွဲထားခဲ့တဲ့ အခံကြောင့် အဆိုပါရက်ပိုင်းအတွင်းစိတ်ဖိစီးမှုများပြားခဲ့တယ်လို့သိရပါတယ်။ ဒါ့အပြင်သူဟာ အခုနောက်ပိုင်းမှာလဲ တက်သစ်စ မော်လ်ဒယ်တစ်ယောက်နဲ့တွဲနေတယ်ဆိုတဲ့ သတင်းတွေပရိသတ်ကြားမှာ သို့လောသို့လောပျံ့နှံ့ခဲ့သလို အထင်လွဲစရာအချို့ကြောင့်လဲ သူ့ရဲ့အချစ်ရေး၊ ဂီတ၊ ဖက်ရှင်ပိုင်းအစစအရာရာမှာ လူအများ ဝေဖန်စရာတွေဖြစ်ခဲ့အတွက်သူရှိရာသို့သွားရောက်ပြီး ဝေဖန်မှုများအပေါ် စိတ်ခံစားချက်များနဲ့လက်ရှိဂီတလှုပ်ရှားမှုများကို သွားရောက်မေးမြန်းဖြစ်တဲ့အခါ
-နောက်တစ်ခုက အစ်ကို့ကိုလူရွှင်တော်ကြာစိနဲ့တူတယ်ဆိုပြီး နောက်ကြတာမျိုးရှိတယ်။ အဲဒီအပေါ်မှာရော ဘယ်လိုခံစားရလဲ။
ကိုကြာစိတို့နောက် 5 Stars ဆိုတာ ကျွန်တော်အရမ်းကြိုက်တယ်။ အပြောင်အပျက်တွေကိုသဘောကျတယ်။ ဦးကြင်ဝှက်နဲ့လဲရိုက်ဖူးတယ်။ သဘောကျတယ်ပေါ့။ သူတို့နဲ့အပြင်မှာဆုံရင်လဲ ပျော်ပျော်ပါးပါးပဲနေတယ်။ ကျွန်တော်က လူတစ်ယောက်ခံစားချက်အနေနဲ့ပြောရရင် ကျွန်တော့်ကို တခြားလူတစ်ယောက်နာမည်နဲ့ပြောတာကိုမကြိုက်ဘူး။ ကိုကြာစိမို့လို့မဟုတ်ဘူး။ ကျွန်တော့်ကို တခြားတစ်ယောက်နာမည်နဲ့ခေါင်းစဉ်တတ်တာမကြိုက်ဘူး။ သူ့အတွက်လဲမကောင်းဘူး။ ကျွန်တော်ကရဲရင့်အောင်ပဲ။ တခြားသူဘယ်တော့မှလဲဖြစ်မှာမဟုတ်ပါဘူး။
-အခုလက်ရှိ ဘာတွေလုပ်ဖြစ်နေလဲ။
ကျွန်တော့်ဒုတိယအခွေအတွက် ပြင်ဆင်နေတယ်။ သီချင်းတွေရေးတယ်။ အဲ့ဒီသီချင်းတွေကို ဘယ်လိုဖန်တီးရမလဲဆိုတာကို သူငယ်ချင်းတွေနဲ့တိုင်ပင်တယ်။ နောက်ပြီးလိုအပ်တာလေးတွေလုပ်ဖြစ်နေတယ်။
-ဒုတိယအခွေကရော ပထမအခွေနဲ့ဘာတွေကွာခြားချက်ရှိမလဲ။
ကျွန်တော်အရင်တုန်းက ဆိုနေကျပုံစံ၊ ကျွန်တော်သီချင်းရေးနေကျပုံစံကနေပဲ တစ်ခုခုခွဲထွက်သွားတာပဲဖြစ်မှာပါ။ ကျွန်တော့်ပုံစံကိုပဲ အပြောင်းအလဲတွေအများကြီးဖြစ်အောင်လုပ်ထားပါတယ်။ သီချင်းကလောလောဆယ် ၁၁ ပုဒ်လောက်ထည့်ဖို့စဉ်းစားထားတယ်။ တစ်ခွေလုံးကို ကျွန်တော်ပဲရေးတာပါ။ ဒါပေမဲ့ ကိုဝေလရေးထားတဲ့တစ်ပုဒ်တော့ပါတယ်။ Featuring အနေနဲ့ကလောလောဆယ် အပြင်ကသူငယ်ချင်းတွေကိုတော့ မပြောရသေးဘူး။ ကျွန်တော်နဲ့လက်တွဲလုပ်နေတဲ့ သူငယ်ချင်းတွေပဲ စီမံခန့်ခွဲပြီး နေရာချရသေးပါတယ်။ တခြားအပြင်က Featuring သူငယ်ချင်းတွေတော့ မခေါ်ရသေးပါဘူး။
-ဘယ်လောက်လောက်ပြီးသွားပြီလဲ။
သီချင်းရေးတဲ့အပိုင်းက တစ်ဝက်ကျော်ကျော်ပြီးသွားပါပြီ။ ဒါပေမဲ့သီချင်းပုံစံက ဘယ်လိုပုံစံတီးရင်ကောင်းမလဲ။ ဘယ်လိုပုံစံဖန်တီးရင်ကောင်းမလဲက လုပ်နေဆဲပဲပေါ့။ ကျွန်တော်ဒီနှစ်ထဲမှာ ထွက်နိုင်အောင်ကြိုးစားမှာပါ။
-ဒုတိယအခွေမထွက်သေးခင် စပ်ကြားမှာရော အွန်လိုင်းကနေကြားညှပ်ပြီး တင်ပေးဖို့အစီအစဉ်ရှိမလား။
တင်ချင်တဲ့စိတ်ကူးလေးတော့ရှိပါတယ်။ ဒါပေမဲ့ အဲ့ဒါတွေအားလုံးက သီချင်းတွေအားလုံးလုပ်ပြီးသွားတော့မှ ဒီသီချင်းလေးတော့ ငါပရိသတ်ကိုပေးမယ်။ ဘယ်သီချင်းကိုတော့ မတင်ပေးသေးဘူးဆိုတာမျိုးဖြစ်လာမှာဆိုတော့ အရင်ဆုံး လုပ်နေတဲ့သီချင်းတွေပြီးအောင်ပဲကြိုးစားနေပါတယ်။
-အရှေ့မှာတင်ခဲ့တဲ့ ဒီလောက်နဲ့ပဲကျေနပ်ပါတယ်။ သီချင်းရဲ့ အောင်မြင်မှုအပေါ်မှာရော ဘယ်လိုခံစားရလဲ။
အဲ့ဒီသီချင်းနဲ့ပတ်သက်ပြီးတော့ ၀မ်းသာတယ်။ ပျော်တယ်။ ဘာလို့လဲဆိုတော့ ကိုယ်တစ်ယောက်တည်းဖန်တီးခဲ့တာမဟုတ်ဘူး။ ကျွန်တော့်သူငယ်ချင်းတွေဘေးနားကနေအိပ်ရေးပျက်ခံပြီး ၀ိုင်းဖန်တီးပေးကြတယ်။ ကျွန်တော့်သူငယ်ချင်းတွေလဲအရမ်းပင်ပန်းပါတယ်။ အဲ့ဒါကို ပရိသတ်လက်ခံတဲ့အတွက် ကျွန်တော်အရမ်းဝမ်းသာပါတယ်။ နောက်အလုပ်တွေဆက်ပြီးတော့ လုပ်ဖို့လဲ အရမ်းအားရှိပါတယ်။
-အဲ့ဒီသီချင်းက ဒုတိယအခွေထဲမှာ ပါမဲ့ သီချင်းလား။
ဟုတ်တယ်။ ဒုတိယအခွေထဲမှာ ပါမှာပါ။
-တချို့ပရိသတ်တွေကျတော့လဲ ဒီသီချင်းနဲ့ပတ်သက်ပြီး မျက်ရည်ချူတယ်။ မားကတ်တင်းဆင်းတယ်ဆိုပြီး ဝေဖန်ကြတဲ့အပေါ်မှာရော ဘယ်လိုခံစားရလဲ။
ဘယ်လိုပြောမလဲ။ လူဆိုတာ တစ်ယောက်နဲ့တစ်ယောက်မတူဘူးလေ။ အမြင်ကလဲတူချင်မှတူမယ်။ လူဆိုတာ အကြောင်းအရာအကုန်လုံးကိုမသိနိုင်ဘူးလေ။ သိသလောက်နဲ့ပြောတယ်။ ကျွန်တော့အတွက်ကတော့ ဘာမှပြသနာမရှိပါဘူး။ ကျွန်တော်သိတာက ဒီသီချင်းအပေါ်မှာ ကျွန်တော်တို့အားလုံး စေတနာအများကြီးထားပြီးလုပ်လိုက်တယ်။ အဲ့ဒီအတွက်ကျေနပ်တယ်။
-ဒုတိယအခွေမှာရော အချစ်သီချင်း၊ အသည်းကွဲသီချင်း၊ ဘ၀နဲ့ပတ်သက်တဲ့အကြောင်းအရာတွေဆို ဘယ်ဟာပိုများမလဲ။
အချစ်သီချင်းတစ်ဝက်၊ အခြားဆန်းကြတယ်တဲ့အကြောင်းအရာတွေတစ်ဝက်ပါပါတယ်။ ဘ၀နဲ့ပတ်သက်တာလေးတွေလဲပါပါတယ်။
-ပြီးခဲ့တဲ့ ချစ်သူများနေ့ကိုရော ဘယ်လိုမျိုးဖြတ်သန်းဖြစ်ခဲ့လဲ။
ချစ်သူများနေ့က အိပ်ရေးပျက်တယ်။ ဘာလို့လဲဆိုတော့ အဲ့ဒီနေ့ရှိုးမှာဆိုဖို့အတွက်သီချင်းတိုက်တာ မိုးပါလင်းသွားတယ်။ အစောကြီးပြန်ထရတယ်။ နေမကောင်းပေမဲ့ သီချင်းသွားဆိုရတယ်။ ပရိသတ်တွေနဲ့ဖြတ်သန်းတယ်။
-လူငယ်သဘာဝဖြတ်သန်းမှုအနေနဲ့ရော ဘာတွေလုပ်ခဲ့သေးလဲ။
ဘာမှမရှိပါဘူး။ ဘာမှမရှိဘူးဆိုတာ ကျွန်တော်အဲ့ဒီနေ့ညက သီချင်းမဆိုနိုင်မှာကို အရမ်းစိတ်ပူတယ်။ ကျွန်တော့် Valentine’s က အမြဲတမ်း အဲ့ဒီတိုင်းပါပဲ။ ကျွန်တော့ ပရိသတ်တွေကတော့ ချောကလက်တွေ၊ စာအုပ်တွေပေးကြတယ်။
-ကိုယ်ကိုတိုင်ကရော သူများကိုပေးဖြစ်သေးလား။
ကျွန်တော် ဒီနှစ်ပရိသတ်တွေကိုဘာမှမပေးဖြစ်ဘူး။ နေမကောင်းဘူး။ အားမရှိဘူး။ သီချင်းမဆိုနိုင်ဘူး။ အဲ့ဒီစိတ်ကြီးနဲ့ဆိုတော့ တခြားဟာတွေမလုပ်ဖြစ်လိုက်ဘူး။
-ချစ်သူများနေ့ကတင်တဲ့အကျီင်္ဆင်တူနဲ့ပုံကြောင့် ပရိသတ်တွေသို့လောသို့လောဖြစ်ခဲ့ရတယ်။ အဲ့ဒီပုံကို နှစ်ယောက်စလုံးတင်ပြီး ပြန်ဖျက်သွားကြတာကိုတွေ့ရတယ်။
ကျွန်တော်အဲ့ဒီအကျီ်မှာပါတဲ့ စာသားလေးက မင်းကြိုက်ခဲ့သမျှအကုန်လုံးကို ငါလွန်ခဲ့တဲ့ငါးနှစ်ကကြိုက်ခဲ့ပြီးသားဆိုတဲ့စာသားလေး ကျွန်တော်အရမ်းကြိုက်တယ်။ အဲ့ဒီအကျီင်္က Trend ကထုတ်တာပါ။ ကိုဝေမင်းမောင်တို့နဲ့ရင်းနှီးနေတော့ ကျွန်တော်အဲ့ဒီအကျီင်္ကိုအရမ်းကြိုက်တယ်။ အရမ်းလဲလိုချင်တယ်။ ဒါပေမဲ့အဲ့ဒီအကျီင်္က couple အတွက်ထုတ်တာပါ။ ဒါပေမဲ့ ကြိုက်လွန်းလို့ကို ချစ်သူများနေ့မတိုင်ခင် တခြားအကျီ်တွေသွားအားပေးရင်းနဲ့အဲ့ဒီအကျီင်္လေးကိုလက်ဆောင်တောင်းလာခဲ့တယ်။ အဲ့ဒါနဲ့ရှိုးဆိုပြီးတဲ့အချိန်မှာ ရှိုးဆိုတဲ့အ၀တ်အစားတွေချွတ်ပြီး အဲ့ဒီအကျီင်္ကိုလဲဝတ်ပြီး ဓာတ်ပုံရိုက်တင်လိုက်တယ်။ အဲ့ဒီမှာ အဲ့ဒီလိုဖြစ်သွားတယ်။
-အဲ့ဒါဆို ဟိုတစ်ယောက်နဲ့ဘာမှမဆိုင်ဘူးပေါ့။
ဆိုင်တယ်ဆိုလဲ အကျီ်င်္ဆင်တူကြီးဝတ်ပြီး လက်တွဲပြီးသွားနေတာမဟုတ်ဘူးလေ။ အဲ့ဒီအကျီ်ကိုဝတ်ခဲ့တယ်ဆိုတာ အဲ့ဒီစာသားကို တကယ်ကြိုက်လို့ပါ။ ပြီးတော့ တစ်ဖက်ကပုံတင်တာကိုလဲကျွန်တော်မသိလိုက်ပါဘူး။ သိသိချင်းပြန်ဖျက်ပါတယ်။ သူလဲသိသိချင်းပြန်ဖျက်သွားတယ်ထင်တယ်။
-အရင်ကတည်းက သူငယ်ချင်းလို့လဲသိရတယ်။ အခုကျတော့ရော။
လွန်ခဲ့တဲ့ သုံးနှစ်လောက်ကတည်းက သူငယ်ချင်းတွေပါ။ အခုလဲသူငယ်ချင်းတွေပါပဲ။
-အခုလက်ရှိကရော ကျန်းမာရေးကကောင်းသွားပြီလား။
ကောင်းသွားပြီ။ ဒီ့ထက်ပိုကောင်းအောင်လဲကြိုးစားနေပါတယ်။
-အရင်ကထက် ပိုပိန်သွားတယ်နော်။
ကျွန်တော်အရင်တုန်းက အားကစားတော်တော်လုပ်ပါတယ်။ ဒါပေမဲ့ ဒုတိယအခွေစလုပ်တဲ့အချိန်မှာ အစားအသောက်မမှန်တော့ဘူး။ ကျွန်တော့်မှာအစာအိမ်ရောဂါလဲရှိတဲ့အခါကျတော့ အစားအသောက်မမှန်တဲ့အခါ ပိန်ကျသွားတာပေါ့။
-လက်ရှိအချစ်ရေးကရော ဘယ်လိုရှိလဲ။
အချစ်ရေးနဲ့ပတ်သက်ပြီးတော့ စာမျက်နှာတွေပေါ်မှာ ဘာမှမပြောချင်တော့ပါဘူး။ ကျွန်တော်က ကျွန်တော့်ပရိသတ်တွေသိပါတယ်။ ဘယ်အရာကိုမှလျှို့ဝှက်ပြီး ဖုံးကွယ်ပြီး နေတဲ့သူမဟုတ်ပါဘူး။ အားလုံးကိုပေါ်တင်လုပ်ပါတယ်။ ကျွန်တော့်ကိုယ်ကျွန်တော်လိပ်ပြာလုံရင်အားလုံးကိုပေါ်တင်လုပ်ပါတယ်။
-အချစ်ကရော အစ်ကို့ဘ၀အတွက်ဘယ်လောက်ထိအရေးပါလဲ။
အရေးမပါဘူးလို့အမြဲတမ်းသတ်မှတ်ခဲ့တယ်။ အရင်တုန်းကပေါ့။ အလုပ်ပဲခေါင်းထဲထည့်တယ်။ အလုပ်ကောင်းကောင်းမွန်မွန်ကြိုးစားမှ ကျွန်တော့်မိသားစုနဲ့ကျွန်တော့ဘေးမှာရှိလာမဲ့သူတွေကိုကောင်းကောင်းမွန်မွန်ထားနိုင်မယ်ဆိုပြီး
တော့ကျွန်တော်အလုပ်ပဲကြိုးစားတယ်။ ဒါပေမဲ့အချစ်ကိုပေါ့ပေါ့ပဲထားခဲ့ပေမဲ့ အချစ်ကလဲအရေးကြီးတယ်လို့ထင်ပါတယ်။
-အခုလက်ရှိက Single လား။
ဟုတ်။ တစ်ယောက်တည်းပဲလေ။ အမှန်အတိုင်းပြောရရင်တော့ Relatonship နဲ့ပတ်သက်ပြီး ကျွန်တော် မပြောချင်ပါဘူး။ Single ဆိုရင်လဲဒီအရွယ်ကြီး single လားဆိုပြီး ဟုတ်လို့ဖြေပေမဲ့ ကျွန်တော်ကိုယ့်ကိုကိုယ်သိမ်ငယ်သွားတယ်။ ရည်းစားရှိလို့ရှိတယ်လို့ဖြေပြန်ရင်လဲတစ်ဖက်မှာတခြားတစ်ယောက်ပါလာတဲ့အတွက်ကျွန်တော်မထိခိုက်စေချင်တဲ့အတွက် Relationship နဲ့ပတ်သက်ပြီး အဲ့ဒီလိုကြီးမဖြေချင်ပါဘူး။
-လူမှုကွန်ယက်ပေါ်မှာ ဝေဖန်ခံရလွန်းတဲ့သူတွေထဲမှာ အစ်ကိုကပါနေတဲ့အခါကျတော့ အခုလဲ မေးစိက အရမ်းချွန်လွန်းနေတယ်။ ပြင်ထားတာဆိုပြီး အသံတွေထပ်ထွက်လာပြန်တယ်။ အဲ့ဒါလေးကိုလဲ ပြောပြပေးပါဦး။
မေးစိနဲ့ပတ်သက်ပြီး လွန်ခဲ့တဲ့ တစ်နှစ်လောက်က ကျွန်တော်တို့ပါဝင်သရုပ်ဆောင်ထားတဲ့ ကားတွေမိတ်ဆက်ပွဲမှာ ကျွန်တော်တစ်ခါဖြေရှင်းပြီးသွားပါပြီ။ ဘာမှတော့ထပ်ပြောစရာမရှိပါဘူး။ ကျွန်တော် ၂၀၁၂ မှာအမုန်းဒိုင်ယာရီ အခွေထွက်တယ်။ အဲ့ဒီကတည်းက အဲ့အတိုင်းပါပဲ။ အရမ်းပိန်သွားရင်မေးစိကချွန်လာရော အဲ့ဒီတော့ ကျွန်တော့်တာဝန်က မပိန်အောင်နေရမှာပါပဲ။ မပိန်ရင် မေးချွန်တော့မှာမဟုတ်ပါဘူး။ မေးစိမပြင်ထားပါဘူး။ ဒါပေမဲ့ အမေနဲ့လိုက်သွားပြီး မေးစိလေးကိုဆေးထိုးဖူးပါတယ်။ ဒါပေမဲ့ခွဲစိတ်တာ၊ ဗွီရှိတ်လုပ်တာတို့မလုပ်ဖူးပါဘူး။ အဲ့ဒီလိုလုပ်ရင် ကြွက်သားတွေချေလိုက်ရတာလို့ကြားဖူးတယ်။ အဲ့ဒါဆိုကျွန်တော်သီချင်းဆိုလို့ရတော့မှာမဟုတ်ပါဘူး။
-အခုနောက်ပိုင်း လူမှုကွန်ယက်ပေါ်မှာ ဝေဖန်အခံရဆုံး သူတစ်ယောက်အနေနဲ့ဒီလိုဝေဖန်မှုတွေ၊ တိုက်ခိုက်မှုတွေခံရတဲ့အခါမှာရော ကိုယ့်ကိုကိုယ်ဘယ်လိုစိတ်ထားပြီးနေဖြစ်လဲ။
ချစ်တဲ့သူကချစ်လိမ့်မယ်။ မချစ်တဲ့သူကတော့ မချစ်ဘူးပေါ့။ ကျွန်တော်လဲအကုန်လုံးကိုမြင်နေရပါတယ်။ တချို့ကျတော့လဲ တခြားဟာတွေဝေဖန်ကြတယ်။ ဘာမှမဖြစ်ပါဘူး။ ဒါပေမဲ့ ကျွန်တော့ သီချင်းတွေနဲ့ပတ်သက်ပြီးတော့ မျက်ရည်ချူတယ်လို့ကျွန်တော့ကိုပြောတယ်။ နောက်ပြီး မားကတ်တင်းဆင်းတာအရမ်းတောတယ်လို့ကျွန်တော့ကိုပြောတယ်။ တကယ်တော့ အဲ့ဒီလိုမဟုတ်ပါဘူး။ ကျွန်တော်ဒီသီချင်းကို ဒီဇင်ဘာလ ၂၃ ရက်နေ့ထဲကရေးထားတယ်ဆိုတဲ့အကြောင်းကိုလဲတင်ထားပြီးပြီ။ သီချင်းကို အမ်တီဗီ share တဲ့နေ့ကလဲ ကျွန်တော်တင်ထားပါတယ်။ အားလုံးပြီးပြီ။ ကျွန်တော့်ကို အဲ့ဒီအကြောင်းတွေမပြောနဲ့တော့ ပြီးပြီလို့ပြောထားတယ်။ သီချင်းကို သီချင်းလို့ပဲမြင်စေချင်တယ်။ ပရိသတ်ဆီကသနားတာတို့တစ်ခုခုလိုချင်ခဲ့တယ်ဆိုရင်အဲ့ဒီသီချင်းကို ဒုက္ခခံပြီး ကျွန်တော့်သူငယ်ချင်းတွေကိုဒုက္ခပေးပြီး အဲ့ဒီလိုဖြစ်အောင်ဖန်တီးစရာမလိုဘူး။ ကျွန်တော်ဂစ်တာလေးတစ်လက်နဲ့ပဲဆိုလို့ရတယ် ။အဲ့ဒီလိုဆို ပရိသတ်နားထဲတောင်ချောချောမွေ့မွေ့နဲ့ဝင်သွားဦးမယ်။ ကျွန်တော်ကို့ရိုးကားရားဖြစ်အောင်လျှောက်ဖန်တီးထားတာပါ။ အဲ့ဒီတော့သီချင်းနဲ့ပတ်သက်ပြီး ကျွန်တော်အဲ့ဒီလောက်ပဲပြောချင်ပါတယ်။ ကျန်တာကတော့ ကိုယ်မှမဟုတ်တာ သူတို့ကိုယ့်လိုဘယ်မြင်ပါ့မလဲဆိုတဲ့ အတွေးနဲ့ပဲကျွန်တော်နေတတ်ပါတယ်။
No comments: