ကလေးမြို့တွင် ကလေးငယ်၂ ဦး ဆိုင်ကယ်တိုက်ခံရပြီးသေဆုံး

ကလေးမြို့၊ မြို့သာရပ်ကွက် ကလေး-ဂန့်ဂေါလမ်းမကြီးပေါ်မှာ ဒီကနေ့မနက် ၁၀ နာရီခွဲလောက်က ဆိုင်ကယ်တိုက်မှု ဖြစ်ပွားခဲ့ပြီး ကလေးငယ် ၂ ဦး သေဆုံးသွားပါတယ်။

ကလေးမြို့မရဲစခန်း တာဝန်ရှိသူ ရဲအုပ်တဦးက “စူပါကတ် ဆိုင်ကယ်နဲ့ ၂ ယောက်တစီး။ အဲဒီမှာ လမ်းအနောက်ခြမ်းကနေ Ray အမျိုးအစား ဇီးရောင်ဆိုင်ကယ်က လမ်းပေါ်ဖြတ်အတက် တိုက်မိတာ။ ကလေးတဦးက နေရာမှာတင် ဦးခေါင်းပွင့်ပြီး သေဆုံးသွားတယ်။ တဦးကတော့ ဆေးရုံရောက်မှ ဆုံးသွားတယ်” လို့ ဆိုပါတယ်။

ကလေးတွေကို တိုက်သွားတဲ့ ဆိုင်ကယ်ကတော့ ထွက်ပြေးသွားတာဖြစ်ပြီး သားရေဂျာကင်ဝတ်ထားတဲ့ အမျိုးသားတဦး ဖြစ်တယ်လို့လည်း သိရပါတယ်။

သေဆုံးတဲ့ကလေးတွေဟာ အသက် ၁၃ နှစ်၊ ၁၄ နှစ် အရွယ်တွေလို့ ခန့်မှန်းရပြီး သူတို့ရဲ့မိသားစုက ဆက်သွယ်လာတာ မရှိသေးလို့ သူတို့နဲ့သက်ဆိုင်တဲ့ အချက်အလက်တွေကို မသိရသေးပါဘူး။

ယာဉ်တိုက်မှုနဲ့ပတ်သက်ပြီး ကလေးမြို့မရဲစခန်းက တိုက်ပြီး ထွက်ပြေးသူကို လိုက်လံစုံစမ်းနေပြီး ရာဇသတ်ကြီးပုဒ်မ ၃၀၄(က) နဲ့ အမှုဖွင့်သွားမယ်လို့လည်း ရဲအုပ်လယ်မန်းက ဆိုပါတယ်။